Din is-sena l-Malta Robotics Olympiad 2017 ġiet mtellgħa ġewwa l-MFCC ta’ Qali fejn attirat konkorrenza ta’ tlettax–il elf persuna fejn tlett elef minnhom kienu studenti minn skejjel varji f’Malta u Għawdex.

 

Il-Malta Robotics Olympiad huwa avveniment immirat għal studenti interessati fis-suġġetti bħal “Computing” u “Design & Technology” u persuni b’interess kbir fit-teknologija b’mod speċjali r-Robotika u l-“programming”.

Qalb id-diversi attrazzjonijiet teknoloġiċi moderni kien hemm diversi kompetizzjonijiet ta’ Gaming u kif ukoll tar-Robotika.  Il-“Lego Sumo Competition” kienet kompetizzjoni miftuħa għall-iskejjel kollha ta’ Malta u Għawdex.

 

L-għan tal-kompetizzjoni kien li żewġ robots jiġġieldu kontra xulxin u dak li jintefa barra mir-ring jitlef. B’kollox ipparteċipaw tnejn u tletin tim minn skejjel u livelli differenti b’kull skola tavvanza livell ieħor fil-kompetizzjoni. Bi tħejjija għal din il-kompetizzjoni l-istudenti impenjaw ruħhom għal madwar xahrejn ta’ ħidma kontinwa fil-‘breaks’. Bl-użu tal-Lego Mindstorms Kit dawn bnew robot magħmul minn tliet muturi, fejn tnejn minnhom intużaw għar-roti u wieħed minnhom għal rampa li tostakola lill-avversarju, f’dan il-każ ir-“Robot”. Biex ir-“Robot” seta’ jaħdem kellu bżonn jiġi programmat biex b’hekk jilħaq l- għan tiegħu u jiġġieled kontra r-Robot kontrih. Il-kreattiva tal-istudenti kienet eċċezzjonali.

 

L-istudenti tar-raba’ sena Stephen Gatt, Matthew Schembri, Gabriel Bonello u Jamie Zammit, immexija mill-għalliema tagħhom is-Sinjorina Maria Cutajar u s-Sur Eman Baldacchino ġewwa il-Kulleġġ San Injazju Skola Subien Ħandaq,  rebħu din il-kompetizzjoni  filwaqt li l-istudenti tat-tielet sena Maya Cucciardi, Theodore Grejdinoiu, Haydon Attard u Logan Camilleri, immexija mill-għalliem tagħhom is-Sur Josmar Borg, kisbu t-tielet post. It-tim rebbieħ issa se ,jkun qiegħed jikkompeti barra minn Malta f’Robotics Olympiad 2018 fuq livell internazzjonali.

 

Fl-istess avveniment, it-tim tad-Disinn u t-Teknologija, fi ħdan l-istess skola, kiseb l-ewwel post bl-istudent tar-raba’ sena Mairek Zahra taħt it-tmexxija tal-għalliem tiegħu is-Sur Michele Cassar.

​

Mr E Baldacchino - Għalliem tal-Kompjuter